الأربعاء، 17 سبتمبر 2008

معاميق الذكريات

حبيت مرة أجرب قوة ذاكرتى....
فقررت أحاول أفتكر أول حاجة أوعى عليها فى حياتى..
حاولت أفتكر نفسى و أنا فى بطن أمى .. بحكم كونى فيا روح من سن مائة و عشرين يوم....
طبعا ما فتكرتش حاجة ....
و بعد عدة محاولات فاشلة من النكش فى معاميق ذاكرتى ... و مراجعات كتيرة للصور إللى تكسف فى ألبومات صور الأسرة ....
لقيت نفسى (خير اللهم أجعله خير) واقف فى طرقة بيتنا قدام باب الحمام المفتوح و أنا عمال أكح كحة جامدة كانت بتقطع نفسى ... يعقبها شدة نفس أجمد (مش أحمد) بيقوله عليها السعال الديكى ... مع إنى شايف إن الشهقة دى مش صوت ديك خالص ... لا مؤاخذة دة تنهيقة حميرى ... و المفروض يسَموه
(مش يسِموه طبعا) السعال الحميرى ... المهم يرجع مرجعونا أنى و أنا بكح كنت كمان بأعيط...
كان مهم جدا أنى أعرف بأعيط ليه لأن سببه هوة إللى عرفنى عمرى كان كام ساعتها...
أتابى والدى – الله يرحمه رحمة واسعة هو و كل أمواتنا – كان واقف بيحلق دقنه ... و أنا كنت بأعيط لأنى كنت عاوز أشوف المولود الجديد أخويا .. إللى كانوا مانعنى أشوفه بسبب حالة السعال الحميرى ... قصدى الديكى... إللى كان عندى علشان مايتعديش منى ...
و بما إن إخويا من مواليد سبتمبر و أصغر منى بثلاث سنين....
إذن - و هنا تظهر عبقريتى الرياضية - كان عمرى ساعتها كام ؟؟؟؟؟؟؟؟؟
الإجابة: و من أول السطر...
ثلاث سنين برضه...
و من هنا إبتدأ يتكون لى ذاكرة عن حياتى فى الدنيا....
و إلى ذكرى أخرى جديدة إن شاء الله...

هناك 12 تعليقًا:

همس يقول...

ياساتر

الف سلامه عليك

مش اهم حاجه ان السعال دا راح دلوقتى صح

الحمد لله


وشكرا انك ودتنا للايام دى معاك

تحياتى

ولد مصري يقول...

يعني اول مرة تفتكر حاجة تفتكر وقفتك قدام باب الحمام .. ايه القرف ده .. انا شايف انك لو ماكنتش افتكرت كان يبقى ارحم

وبعدين انا متهيألي إنك لو ركزت شوية في الذاكرة هتلاقي إن وقوفك قدام باب الحمام هوه سبب الكحة (طبعا من الريحة .. ماهو قرف بقرف بقى)

الحمد لله إنهم ماخلوكش تدخل على أخوك النونو الغلبان بدل ما كنت ترفسه أقصد تعديه :=)))

تحياتي

سميرة يقول...

الذكريات

الذكريات الحلوة دايماً بنحرص على الا تضيع من غياهب الذاكرة
لكن الذكريات الموجعة بننساها او بنحاول ما نذكرهاش خالص ...
بجد البوست جميل وفكرتني بالذي مضى

اشكرك

الف سلامة عليك م السعال وربنا ينعم عليك الصحة ، علشان مايبقاش باب النجار مخلع ولا ايه يادكتور :)))))

تحياتي

غير معرف يقول...

yaaah ya Dr.. 2alebt el zekrayat.. awel youm fe el madrassah.. awel youm akra2 el gornan bekol fa7'r 2odam my grand father allah yer7amoh..
u asked me before about my blog.. I have one already but it is forward for another culture.. u can check it out in
myspace.com/mahmoud_tammam
u gonna find my page and some blogs in it..

Bobbos يقول...

همس

بشكر سعادتك على الزيارة الكريمة و إن شاء الله نردهالك فى الأفراح.

الحمد لله على نعمة الصحة, الكحة راحت بس إللى جه مكانها كتير

Bobbos يقول...

Walad_ Masry

الكلمة الطيبة صدقة يا باشا

أنا كنت بحكى إللى فاكره مش إللى شامه..

Bobbos يقول...

سميرة

دايما رافعة معنوياتى بأسانسير

الذكريات سواء كانت حلوة أو مؤلمة هى جزء مننا و من حياتنا

رضينا أم أبينا..

المهم أستفدنا منها و لا لأ

Bobbos يقول...

كلام على بلاطة

شرفتنا سعادتك و كنت أحب أسمع منك

Bobbos يقول...

محمود باشا

أنت صعب تكتب بالعربى من عندك بالعربى.

أحــوال الهـوي يقول...

العبقرية ان تتخطي حدود المكان و الزمان وايضا حدود الحمام لانة مكان لكل الذكريات العاطرة و لما تفتكر السعال الديكي ما حددتش نوع الديك بلدي والا شركسي لان يا دكتووور لكل نوع علاج فاذا كان شركسي فعلاجة الخنق و اذا كان بلدي فعلاجة الغرق في الكنيف


تحياتي

غير معرف يقول...

Abbas Basha
Salamt , kol aam wantom bekhair,
Mohamed elghoroury

هبة النيــل يقول...

هههههههههههههه

لا ألف سلامة والله

سبحان الله

احيانا "لقطات" فعلا من الشريط لا تنسى

تصدق فكرتني بلقطة غريبة جدااا بردو

بس على باب "المطبخ" بتاع جدتي الله يرحمها

كان وااااسه خير اللهم اجعله خير وأرضيته أخضر فاخضر

ورجلية الاتنين مربوطين "أقدامي" من النص

(أتابي) ههههههه هيّه أتاري تقريبا

اتكسرت كوباية في المطبخ وانا دوست عليها برجلية الاتنين

مش اخاف وامشي لاء عبقرية مفرطة

فجرحت رجلي الاتنين وتانياهم لبرة كدا علشان اقف على حافتهم يعني

وصورة الشغالة اللي عند جدتي واقفة عند البوتاجاز بتعملي "ملوخية" زي مانا طلبت ههههههههههه

كنا بالليل الساعة 9

ايه الفجعة دي

طيب تعبانة اهمدي بأه